20 Apr 2015
By:Redaksi
1,235 views DILI - Estadu aloka osan Millaun 2 ba Falintil-Forsa Defeza Timor-Leste (F-FDTL) ho Polisia Nasional Timor-Leste (PNTL) hodi halao operasaun konjunta ba Mauk Moruk ho nia grupu, maibe osan nee estraga deit, tanba operasaun nee too agora laiha rezultadu.
“Operasaun HANITA halao husi forsa rua, hasoru grupu kriminozu nebe lidera husi Paulino Gama alias Mauk Moruk. Kuaze fulan ida ona maibe laiha rezultadu, tanba seidauk kaptura Mauk Moruk ho nia elementus importante. Ida nee hatudu katak operasaun la seriu no estraga osan estadu nian deit,” katak Akademiku Evangelino da Costa Hornay ba STL iha Kampus Universidade Dili (UNDIL), Sabadu (18/04/2015).
Nia hanoin, operasaun hasoru grupu kriminozu nebe lidera husi Mauk moruk, husi parte akademiku sira deskonfia iha politika foer, tanba nee too agora seidauk deit kaptura Mauk Moruk ho nia elementus importante sira nee. Forsa sira ba kaptura fali povu sira nebe laiha sala, hodi halo troturasaun, nee hatudu katak forsa sira kontinua kontra direitus umanus.
Akademiku nee mos haree katak, semana-semana komandante husi forsa rua sempre hatoo relatoriu opersaun nia ba Governu, maibe hanesan deit, tanba implementasaun operasaun iha terrenu zero.
Iha parte seluk, Deputadu Bankada CNRT, Cesar Valente dehan, publiku tenke hatene no tetu didiak katak, osan 2 Milloens aloka ba operasaun konjunta ba ema sira nebe gosta halo krime nee, laos osan nee PNTL ho F-FDTL halo fali sira nia projetu ka estraga nee laloos.
“Hau hanoin ita tenke analiza didiak osan nee too ka lae ba forsa rihun ida resin nee atu uza durante fulan ida nia laran. Tanba osan nee tama hotu iha hahan nebe sira han hodi halo operasaun konjunta ba grupu CRM ho Mauk Moruk. Osan nee sei uza durante fulan ida tomak iha terrenu, tan nee bainhira atu halo protesta ba osan nee, maka tenke tetu,” dehan Cesar.
Nunee mos Deputadu João Adrino hateten, forsa sira nee fo sira nia aan ba mate, tanba nee osan nebe Governu fasilita ba sira nee sura hotu sira nia hahan, dader, meudia no kalan. Dalaruma sira mos la hetan perdiam tan karik, tan nee labele kritika malu, buat hotu entrega ba forsa sira.
KOK Tenke Respeita Padraun Direitus Umanus
Relasiona ho violasaun nebe akontese iha operasaun KOK nia laran, Provedoria Direitus Humanus no Justisa (PDHJ) husu ba KOK atu respeita padraun direitus umanus.
Provedor Silverio Pinto Baptista husu ba KOK atu respeita artigu 34 no artigu 147 (2) Konstituisaun RDTL no prinsipiu padraun direitus umanus internasional nebe estadu Timor ratifika ona. Restaura prosesu investigasaun ba rezaltadu monitorizasaun husi PDHJ para bele fo sansaun tuir regras no prosidementu neebe maka iha ona.
Ho ida nee PDHJ husu ba KOK atu estabele lalais mekanizmu simu kesar husi komunidade hasoru operasaun KOK, karik iha terrenu hamosu violasaun direitus humanus. Husu ba KOK atu fo ordem ba ajente no soldadu sira katak operasaun nee tenke halo tuir regras empeñamentu no respeita direitus umanus.
Tanba iha tempu oin mai (futuru) PNTL no F-FDTL dalaruma sei simu knaar misaun ONU nian ba halo misaun dame no paz nian iha nasaun seluk, neebe tenke respeita mos ba direitus umanus. Tanba nee maka operasaun iha rain laran rasik tenke hatudu hahalok respeita ba direitus umanus.
Nia hatutan, KOK presiza fo asesu nomos seguransa ba instituiasun PDHJ, Sosiadade Sivil nomos jornalista sira iha terrenu hodi garante katak atuasaun KOK nian la hamosu Violasaun Direitus Umanus.
Nia husu atu Komando Operasaun, Ministro Defeza no Ministro Seguransa atu foti medidas neebe adekuadu no transparensia ba lalaok operasaun konjunta iha terrenu.
Alende nee Komandante Jeral PNTL, Komisario Julio Hornai rejeita informasaun katak Polisia Bataliaun Ordem Publiko (BOP) Baucau lori kilat tiru jovem nain rua ho motor nia roda. Tanba kartus musan la kona roda maibe kona fali alktaraun depois alkataraun katik hodi hakanek joven nai rua nee.
“Nee laos kilat musan maka kona, kuandu kilat musan kona dereita o nia ain hanesan nee o la aproveita, jadi laos kilat musan maka kona mais kilat musan kona aspal, nee maka aspal nee sai ba hodi kona-ba fali ninia ain sira nee hodi halo ninia ain nee mean-mean, so kanek ida deit,” esplika Komisario Julio.
Nia haktuir, akontesementu nee por volta tuku 6 lorokraik husi joven sira nebe maka iha Baucau. Atividade tarikan nee laos foin maka primeiraves joven sira halo maibe bebeik ona halo asaun ho atividade tarikan motor nee iha dalan publiku nebe maka laos fatin ba halo atividade tarikan motor, nunee hodi impede movimentu transporte publiku no komunidade sira maka liu husi area Baucau.
“Atividade tarikan nee akontese iha tempu neebe operasaun KOK ida iha Baucau kona-ba atividade sira neebe maka akontese iha Baucau neebe maka obriga Governu atu foti medidas totelares ba asaun refere,” tenik Julio. João Anibal/Domingas Gomes
